السلام عليكم ورحمة الله وبركاته
كيفكم إنشاء الله تكونو بأتم صحة وعافية
اليوم راح أتكلم عن تجربتي مع البخاخات أول شي
1- سهلت علي عملية التنظيف وصرت أنجز بأقل وقت
2- حددت البخاخات كل لون لشيء معين
3- تقدرين تنظفين فيها باي مكان بدون ماينكب شي منه يعني بالمختصر المفيد خفيف الحمل سهل التنقل
وش رايكم شي مرة يحمس وحلو بنفس الوقت مالكم أي عذر بالتنظيف وتقدرون تحطونها بأي محل سواء في سلة أو غيرها
وهذه صورة للبخاخات
1- أول بخاخ لونه أزرق مكوناته من أشياء طبيعية موجودة بالبيت
((خل أبيض حق الأكل +ماي ويفضل تكون ماي شرب يعني ماي حلوة))
س: كيف أستفيد من الماي والخل في التنظيف؟
يعطي لمعة لكل شي قزاز ((مرايا-شبابيك-كاسات-فناجيل الشايالشفافة))
يعني أي شي يخطر على بالكم قزاز يصلحله هالبخاخ
بالنسبة للمرايا بدل ماتمسحو بمنظف القزاز تمسحو فيه
بالنسبة للكاسات والفناجيل بخو عليهم من البخاخ وخليهم لمدة دقيقة وبعدين غسليهم بالصابون وشفو اللمعة كيف تكون
س: كيف أتخلص من ريحة الخل إذا كانت قوية ؟
أضيف على البخاخ ثلاث قطرات من الزيوت العطرية مثل زيوت الفواحات موجودة بكثرة عند سنتر بوينت مثل اللافندر أوأي ريحة إنتم تحبونها بكذا تروح ريحة الخل
وبنفس الوقت يبقى مفعول الخل اللي نبيه
س: كيف أفرق بين البخاخات؟
لو تلاحظون أنا حاطة لصقة رصاصية على البخاخ الأزرق
وكاتبة عليه مكونات البخاخ وإستخداماته للتوضيح لكم
بس عن نفسي إذا كانت البخاخات ملونة راح تعرفون إن كل لون له إستخدام معين
--------------------------------------------------
2-ثاني بخاخ لونه أخضر مكوناته ((صابون غسل المواعين+ماي))
س: كيف أستفيد من هالبخاخ في عملية التنظيف؟
أستخدمه لكل شي يحتاج لتنظيف بماي وصابون
أرش على المحل المراد تنظيفه وبعدين أفركه وأكمل الباقي على حسب المكان
((المطبخ - الحمام- الشبابيك-أي شي ))
----------------------------------------------------
3- ثالث بخاخ لونه رصاصي مكوناته((ماي+مطهرداك*معقم*))
مو شرط داك تقدرون تستخدمون أي مطهر داك أوديتول أو أي شي متوفر عندكم
س: كيف أستفيد من هالبخاخ في عملية التنظيف؟
أستخدمه لأي غرض يحتاج للتطهير والتعقيم
------------------------------------------
((ملاحظة))
بالنسبة للبخاخات
محل الشراء: إيبو -مجمع العثيم مول -الدمام
الدور اللي تحت مقهى ستار بوكس
سعر البخاخ الواحد: 9 ريال
البخاخ: فيه منه عدة الوان وأشكال بعضها شفافة وبعضها موشفاف
---------------------------------------------
وبكذا يكون إنتهى موضوعي لليوم
أتمنى إنكم إستفدتوا
يسعدني تواصلكم وطرح على أسئلتكم على
التويتر
https://twitter.com/jasmyen2009
الإنستغرام
http://instagram.com/mohebatalaseemh
إشتركو بالمدونة ليصلكم جديد المواضيع
مع السلامة
