السلام عليكم ورحمة الله وبركاته
القراءة غذاء للعقل تغيير للفكر شعور بالسعادة وقت تعلم الجديد أنيسة الوحدة هي حياة وليست فترة وتمضي تبدل من حياة إلى حياة أخرى
كل شي راح أتكلم عنه بما يختص بالقراءة راح يعبر عن تجربتي الشخصية وليس لها علاقة بأي شخص آخر جربت عدة طرق وهذه الطرق هي اللي نفعت معي وارتحت عليها
س : كيف أحب القراءة وأستمر عليها ؟
بعد التجربة أكثر شيء حببني بالقراءة
١-لما أقرأ بالمجال اللي أحبه وحابه أتعمق أكثر لمعلومات أكثر وفي نفس الوقت تصحيح لكثير من المعلومات اللي تكون عارفتها فمع القراءة يتبين لي الصح من الخطأ
٢- أقرأ إذا في مجال أحس ودي أعرف عنه أومحتاجة لمعلومات أكثر عنه
سواء في مجال العمل أو خارجه في الحياة اليومية في أي مجال أو فهالشيء مايخلني أزهق من القراءة أو أتركها وبنفس الوقت مع القرادة والإستكشاف أحلى شعور يكون السعادة
والقراءة مو مقتصرة على الكتب فقط لا
القراءة قراءة الكتب -روشتة الدواء-المجلات الصحف مواضيع على النت تصفح وقراءة المدونات للبحث عن معلومات ومواضيع معينة حتى كتب الطبخ الخياطة الغذاء تعتبر قراءة
ملاحظة مهمة:
في حال زهقتي من المجال اللي قاعدة تقرين غيري لمجال ثاني
مثال :لو كنتي تقرين في كتب عن إدارة الوقت أغير إلى مجال ثاني مثل الروايات ككسر للروتين وتغيير عشان ماأمل من القراءة وهالطريقة جبارة أنصحكم فيها
طيب في حال غيرتي ومانفت معكي الطريقة ومانتي قادرة تقرين ولاكتاب هينا أقولك معليش وقفي لأن هالفترة الكل يمر فيها وتسمى غياب وفقدان الشغف للشي اللي تحبينه مو شرط القراءة ينطبق على أي شي ثاني خذي فترة راحة وازني أمورك ورتبيها عشان لما ترجعين تكون الرجعة بقوة
س: كيف أخلي غيري يحب القراءة ويستمر عليها؟
*لاتجبرينه على نوع معين من الكتب
*شوفي وش الميول اللي يحبهاويهتم فيها بكثره
*أهديه كتاب بنفس الميول
*أو أهديه بطاقة مدفوعة مسبقاً مخصصة للكتب وهو يروح يختاراللي يبي ((هذه الفكرة حلوة للكباريختارون براحتهم ومايحسون إن في أحد راح يلزمهم بشيءمعين))
*أو تروحين معه المكتبة يصير تبادل سوالف ويشاركك بالكتب اللي يبيهاوتعطينه رايك فقط رايك خليه يختار بنفسه
*من الأفكارالحلوة تسألين بين فترة وفترة عن الكتب اللي شراهابشكل غير مباشر هينا طلعي ابداعك فيروح يقرأ الكتاب وبعد فترة راح يكون متحمس تسألينه عنها عشان يآخذ ويعطي معكي وخذي وأعطي معاه راح تلقين نفسك دخلتو بجو وسوالف ماراح تحسون بالوقت ((هالطريقة جربتها مع أخوي وظبطت))
من الأخبار الحلوة اللي صارت أمس جاني من المدرسة وهو مستعير كتاب من المكتبة وخلص قرائته بيوم واحد وقعد يقولي كيف استعاره ونفس ماقلتلكم فوق قعدنا نسولف ويقولي عن محتوى الكتاب
س: كم أخصص وقت للقراءة ؟
أقدر أقول من تجربتي مافي وقت وزمن محدد وبنفس الوقت المزاج ونوعية ومحتوى الكتاب يلعب دور في تحديد الوقت
بداياتي كنت أخصص في كل يوم ساعة للقراءة بعدها حسيت إن الكتب اللي أقراها تحمسني أكثر وماأبي أوقف قراءة وماتكفيني الساعة فصرت أستمر بالقراءة لين ماتجي المرحلة اللي أحس إن عقلي مابدايستوعب الكلام فأوقف القراءة
ومن الطرق اللي جربتها تقسيم الكتاب على حسب عدد صفحات الكتاب
هالسنة بديت بتقويم بوك تشينو للقراءة أناإخترت الميلادي يجشعك على القراءة تلقونه موجود بحسابهم
وهالفديو يوضح طريقة إستخدامه
س: وش المردود اللي باخذه من قراءة الكتب؟
عن نفسي تغير فكري حياتي تعلمت أشياء ماكنت أعرفها من قبل وتصححت عندي أشياءكنت فاهمتها بشكل إنها خطأ وعرفت الصح
كثر القراءة صححت حتى طريقتي في الكتابة صرت أقدر كتاباتي بشكل أفضل
كونت دفتر لكتاباتي أحتفظ بها لنفسي ماكنت أتوقع إنه يجي يوم بنفسي أكتب هالكتابات فخورة بنفسي
صرت أقدر أرتب أفكاري بشكل أفضل
تعرفت على كتب ومجلات وبرامج ماقد سمعت عنها وكل هالشيء من خلال الكتب
تعيشين عالم ثاني كأنه اللي يملكه أنا لوحدي ولما أي المعلومات تتثبت عندي أنقلها لغيري عشان تثبت المعلومة عندي وماأنساها
القراءة سر من أسرار السعادة بالنسبة لي والله يابنات ماتتخيلون قد ايش أفرح لما أقرأ معلومات جديدة أول مرة أعرفها وأطبقها على نفسي مرة فخورة بنفسي
هالشعور ماراح تحسون فيه إلا لما تقرون
س: هل في وقت مخصص للقراءة ؟
كنت أقرأ الصباح أول ماأقوم بعدها بفترة صرت مشغولة فصرت أقرأ وقت الليل
الخلاصة مافي وقت محدد للقراءة الوقت اللي تكوني فيه فاضية المهم مايعدي اليوم إلا قريتي فيه
وأهم شي يكون المكان هادي وبعيد عن كل شي له علاقة بالسوشال ميديا ((جوال-لابتوب-تلفزيون))
لأن الحالة اللي راح تصير كالتالي اي بس هالسنابات وبسكر وتخلصين منهاوتفرين فرة عالإنستقرام وهكذا بدون ماتحسين
إنشاء الله يكون الجزء الأول فادكم أتمنى منكم طرح تجاربكم تحت في التعليقات
نراكم في الجزء الثاني
مع السلامة
