السلام عليكم ورحمة الله وبركاته
موضوع اليوم بيكون عن تجربتي مع ترطيب الجسم كريمات -زبدة - زيت إستخدمتها وش اللي يستحق إنكم تشترونه ونتايجه حلوة في الترطيب ووش الكريمات االلي ماعجبتني وماأنصحكم فيها
نبدأ على بركة الله
كريم سيتافيل من يوم مابدأت بالترطيب ماأستخدم غيره مرة عجبني أنصحكم فيه وبشده
وراح أعطيكم سر من أسراري وقت المناسبات المعروف عنا يالبنات لما نسوي مكياج حتى اليدين نحط عليها كريم أساس وبودرة لكن أنا هالشيء مايعجبني أكتفي بترطيب اليدين يعطي اليد قلو ولاحظت هالشي لما الناس تسألني وش محاطة على يدينك يعني تخيلو هالشيء مع إضاءات القاعة على يدك واو
كريم كيو في زي ماقلتلكم فوق كنت أستخدم سيتافيل لكن جت فترة وصار مقطوع من كل الصيدليات فقعدت أبحث عن شي يشبهه فاكتشفت هالكريم مرة حبيته وعجبني فصرت مستمره علية لكن وش الفرق بينه وبين سيتافيل
راح أقولكم كريم كيوفي علبته أصغر ترطيبه أكثر من سيتافيل وسعره أقل
أما سيتافيل علبته أكبر ويجلس معاك مدة أطول سعره كل ماله يزيد
طيب اللحين راح أتكلم عن كريم كيوفي العصار حلو للشنطة ونفس نتايج اللي بالعلبة في منه ثلاث أنواع الأزرق والسماوي والوردي
الأزرق الغامق مرة حلو ترطيبه فكل مايخلص أرجع أشتريه من جديد وصفته لي دكتورة الجلدية لترطيب الوجه وتقولل يناسب جميع أنواع البشرات وفعلاً مرة حلو أما السماوي مع انه كاتبين عليه للبشرة شديدة الجفاف لكن جداً سيء قوامه مثل الفازلين اذا حطيته على بشرتك مره يدبق ويلزق وماتمتصه البشره
من اليمين : كريم جلسيوليد من أقدم وأرخص وأقوى الكريمات اللي متوفره بكل مكان لكن قوامه ثقيل عالبشرة
لكن هالفترة صرت أستخدمه مع مكونات ثانيه وسويت منه خلطة حتى ماما عجبتها لو حابين أتكلم عن هالخلطة اكتبولي تحت بالتعليقات
كريم جلسرين إستخدمته مره وحدة فقط قوامه أخف من اللي قبله وتمتصه البشرة بسرعةلكن مستحيل أستخدمه من جديد إكتشفت من ضمن مكوناته العطر فأي كريم قبل ماتشترينه انتبهي من الخلف لكلمة ((INGREDIENTS)) يعني مكونات الكريم إذا موجود كلمة((Parfum)) يعني عطر لاتاخذينه لأن العطر بالكريم يسمر البشرة إلا في حالة وحدة إذا بستخدمينه بالليل ماراح يسمرها لكي
من اليسار : كريم أفالون فارما من أحلى الكريمات اللي جربتها ومع الإستمرار يعمل على التفتيح ترطيبه مثل سيتافيل وكيوفي لكن وش اللي يميز هالكريم عن غيره مع إنه من مكوناته العطر وجود مادة اللانولين هالمادة أعتبرها كنز وش فايدة هالمادة تساعد على تفتيح لون البشرة مع الإستمرار وحطو على هالكلمة عشرة خطوط
من اليمين : كريم جونسون بيبي كير صراحة ماكنت أؤمن بكريمات هالبراند إلا في يوم من الأيام طحت عليه عند ماما
تستخدمه وتمدحه فتمت المصادرة وصرت أستخدمه بالطلعات وصدمت من نتايجه صح رنه من مكوناته العطر لكن إستخدامي له فقط بالطلعات مو يومياً
أولا ترطيبه تحسين فيه بسرعة ويطول عاليدين لساعات طويلة ثانياً ريحته تذكرني بريحة الأطفال الصغار
من اليسار: لوشن فازلين الوردي إستمريت عله شهرين ماشفت منه أي نتايج بالعكس سمر يدي وحتى ترطيبه مو ذاك الزود لأنه لوشن
من اليمين : بخاخ زيت لترطيب الجسم بالأرقان أويل جربته بأكثر من طريقة وماعجبني قوامه وماتمتصه البشره جداً سيء
من اليسار: زبدة الجسم من ذا بودي شوب بريحة البابايا الريحة جدا جميلة وترطيبها مرة حلو وتمتصها البشرة تنفع وقت الشتا من ناحية الشراد بين وبين يمكن أرجع أشتريها بس مو بالفترة الحالية
في الأخير عندي لكم ملاحظة حابة أفيدكم فيها بالنسبة للكريمات الترطيب المرتفع سعرها مثل ((سيتافيل-كيوفي -أفالون فارما))حاولو تستغلون العروض بالفترة الحالية للصيدليات وتاخذون منها كم حبة لكن إنتبهو لتاريخ الإنتهاء
إنشاد الله أكون أفدتكم بهالموضوع وأشوفكم بموضوع قريب
مع السلامة
